Ила ыле гын, йочалан моткочак мастарын возышо сылнымутчо Василий Васильевич Крыловлан (Шулдыр Васлий) тений ага тылзын 4 кечынже 65 ий темеш ыле. Лачак тиде лӱмпалылан пӧлеклалтын ыле тиде кечын Арын школышто эртыше «Лач пырляште весела»  конкурс эртен.

Конкурсышто районысо тӱрлӧ школлышто тунемше-влак поэтын почеламутлажым шергылтареныт, сценкым устан модын ончыктеныт.

Василий Крыловым тыште порын шарнат. С.Чавайн лӱмеш школ пырдыжеш шочмыжлан 60 ий темме вашеш тудлан шарныктыш оҥам вераҥденыт. Ты шарнымаш кечышке Василий Васильевичын лишыл еҥже-влак: шӱжарже Татьяна Васильевна Жилина, пелашыже Галина Нколаевна да Марианна ӱдыржӧ, тыгак Йошкар-Ола гыч Марий Эл Республикын Кугыжаныш Погын председательын алмаштышыже А.Иванов, поэт да драматург А.Петров, Россий писатель ушемын Марий Эл Республикысе пӧлкажым вуйлатыше С.Архипова, "Марий книга издательстве" савыктыш пӧртын директоржо, "Ямде лий" газетын уло ешыже миеныт.

Землякыштым, лишыл еҥыштым да йолташыштым шарналташ погынышо-влак могай тудо весела, мыскараче, чулым да уста мутмастар, сай йолташ, иза, пелаш да поро ача лиймыж нерген эше ик гана ушештарышт. А Марианна ӱдыржӧ ачажын тудлан пӧлеклыме сылнымут орлаҥгыже-влак кузе шочмо нерген оҥайын каласкалыш. (Фото-влакым А.Титов ыштен)